Educational Frontliner

May mga umagang 'di ako nagkakape
Walang init na gumuguhit sa lalamunan
Tutungo sa banyo, may alampay na tuwalya
Ang isip ay tila saranggolang walang pisi
Hanggang matapos
Nagpatuyo.
Nagbihis.
Nag-ayos.
Pipilitin ang mukhang maging handa
Papantayin ang kilay
Kukulayan ang mga labi
Tapos ngingiti.
Hahanapin ang selpon 
Ihahanda ang laptop
Babatak muli sa paghubog 
Babagtasin ang mga kalsada ng internet
Tutusok muli ng mga isipang hilaw pa sa mundo
Magpapaka-paos
Magpapaka-pawis
Magpapaka-pagod
Magpapaka-dalubhasa
Bibihisan ang mga hubad na isipan
Pakikilusin ang mga tinatamad pang mga kamay
Pupukawin ang mga mapanuklas na mata
Hahayaan silang maglaro sa kalawakan ng kanilang imahinasyon
Tiya-tiyagain ang aandap-andap na koneksyon
Higit sa lahat
Susuungin ang maghapon
Makikibaka sa init at ingay 
Ng sabay-sabay na tanong
Ng sunud sunod na sumbong
Ng lahat ng elemento
Na siyang bumubuo ng aking araw
Ng aking buwan
Ng aking taon
Ng aking buhay
Ng buo kong buhay
Ito ang aking sumpa 
Sumpa na tulad ng kapeng di ko mainom sa umaga
Mga nakasanayang di na magagawa pa
Kasabik-sabik. Humahagod.
Bumabatak. Bumabaon.
Tumutusok. Tumitimo.
Kabitaw-bitaw ma'y
Gawain pa ring may puso.